Sèvis difizyon mizik Apple la anpil moun t’ap tann nan ap vini lòt mwa nan dat 8 jen nan Worldwide Developers Conference e li rele Apple Music. Se sa sit web 9to5Mac fè konnen. Apple ap planifye pou li lanse sèvis la, ki baze sou sèvis difizyon Beats Music, nan fen lòt mwa a, e sou iOS ap genyen li nan yon nouvo vèsyon aplikasyon mizik la.

Apple Music ap gen yon pati sosyal. Atis yo sèlman ap gen posiblite pou gen yon pwofil; y’ap gen posiblite poste fichye medya tankou bout mizik ak pataje kontni lòt atis, pandan itilizatè nòmal yo kapab renmen (like) oubyen kòmante avèk kont iTunes yo. Ta sanble itilizatè yo kapab dezaktive fonksyonalite sa a nèt si yo pa vle jwenn aktivite atis yo nan aplikasyon an.